Մազերս կտրեցի, որ մեր վրա փողոցում չնայեն, Մազերս կտրեցի, որ մեր վրա մարդ մատով ցույց չտա, Մազերս կտրեցի, հիմա հոգիս կհինայեմ, Աչքերս կթրջեմ արածիս շթի տակ։ Մազերս կտրեցի, որ ավելի հաճախ հետդ լինեմ Մազերս կտրեցի, որ քո հանդեպ տածած սերս ցույց տամ Մազերս կտրեցի, այժմ իմ հայելին կլինես, Կխաբես, թե սիրուն եմ ու կստիպես ժպտալ։ Մազերս կտրեցի, որ «իսկական» տղու նման լինեմ, Մազերս կտրեցի, որ ինձ տանես, ընկերներիդ ցույց տաս, Մազերս կտրեցի, սաղի վրա թքած ունեմ, Ես վաղուց եմ արդեն, ում պետք չի, ցույց տված։ Մազերս կտրեցի, որ ամբոխում հանկարծ չտարբերվեմ, Մազերս կտրեցի, որ ամեն անցորդի աստղով չտամ, Մազերս կտրեցի, պատվիրեցի կանաչ ներկ պատրաստել, Որ քեզանից հետո նորից «ծիծաղելի» դառնամ։ Մազերս կտրեցի, որ ստուգեմ, թե ինչպես սողալ գիտեմ, Մազերս կտրեցի, որ չկարոտեմ սեփական լացին, Մազերս կտրեցի, որ այ սենց հոնքերս կիտեմ, Ու գիշերով գրեմ «Մազերս կտրեցին»։
Չափածո
Չես փոխվում ցավոք
Ամբողջ օրը ցանցում աղմկում է ՀԱԿ-ը`
Նախագահը փոխվեց, լինելու է OK,
Չեմ ուզում էլ լսել, դու ես այն միակը,
Որ ուզում եմ փոխվի, չի փոխվում ցավոք:
Կոնդիցիոներ
Շոգ է, ու ուզում եմ նորից լինի ձմեռ,
Ատում եմ էս անտեր գլոբալ տաքացումը,
Հեռախոսս զանգեց. «Կուզե՞ք կոնդիցիոներ»,
Կարծեցի շահել եմ, իզուր` սոց. հարցում էր:
Խանութները մարմնի պես քո` տաք
Ու ցուրտ էր, մրսում էի, քայլում ու փնտրում
Խանութները մարմնի պես քո` տաք,
Տեսնում ու վազում էի ու մոտ հասնում,
Բայց գտնում էի հոգուս նման` փակ։
Քեմփբլ
Փորձանքը մենակ չի գալիս` Փորձանքը գալիս է քեզ հետ, իմ Քեմփբլ, Հեռախոսով երբ «գլխիս ես տալիս», Կյանքս կորցնում է տեմպը:
Չսիրես էլ ինձ պեսին
Ու եթե հանկարծ սիրես էլ՝ չսիրես էլ ինձ պեսին, Սիրելը սիրելու կեսն է, դու սպասիր հաջորդ կեսին, Ուր ամեն վայրկյան մի հարց է, տե՜ս, հանկարծ չասես «եսիմ»՝ Սիրելը սիրելու կեսն է, կես սիրելը՝ սոսկ տեսիլք:
Ինչպես Լիլուին Լյուկ Բեսսոնը
Դու իմն ես ավելի շատ, քան ես եմ քոնը,
Դու իմն ես ուզած-չուզած, չգիտեմ էլ խի,
Աստված քեզ, ինչպես Լիլուին Լյուկ Բեսսոնը,
Երկնքից է գցել իմ գլխին։
Ինչ աշխարհ չէի եկել
Իսկ աշխարհում արդեն գեղեցիկ է այնքան,
Ա՜խ, որքան վաղուց է, ինչ աշխարհ չէի եկել,
Ես սիրել եմ արդեն հազար միլիոն անգամ,
Բայց այս անգամ կարծես առաջինն է, մեկ է։
Ազատ ցավ չունեմ
Մոտեցեք փոքր ինչ ուշ` ազատ ցավ չունեմ
Էս պահից մինչ հաջորդ աշխարհի արարում։
Ակնոցներս կորցրել եմ, ներեք գույներ,
Դուք բոլորդ էլ նույնն եք թվում խավարում:
Թե ինձ սիրես
Թե ինձ սիրես, Ես կթաղեմ հին սերերս, Ես կթարգեմ միշտ ներելս Ու կփակեմ ներվածներին Մոռացության կատակոմբում, Ես կբացեմ նեղ գետնանցում Իմ հույզերի նորագոյաց, Խեղդող տրոմբում, Որ ներս թողնեմ գոյությունդ: Ու կվառեմ մթում կերոն, Որ իմ հոգին սոմնամբուլիստ Սիրի քեզ միշտ բաց աչքերով: Ես կխաղամ աչքկապոցի չարերի հետ, Ես կպոկեմ կյանքից մի մեծ բախտի թիքա, Ես կընդունեմ լինելությունդ հոգեմետ Ու աշխարհում էլ ոչ մի ցավ աչքիս չի գա: Թե ինձ սիրես, Ես կգտնեմ նորից Վաղուց կորցրած քունս, Ես կնայեմ առանց էկրան Իմ դժբախտ երջանկությունը, Ես կդառնամ խելառ դուալիստ, Ես կպաշտեմ չարքերն ու քեզ, Ինքս իմ պարծանքին վերածված Կսավառնե՜մ, Թե ինձ սիրես:
